Ku gicamunsi cyo kuri uyu wa kane tariki ya 18 Nyakanga 2024, Komisiyo y’Igihugu y’Amatorayatangaje k’uburyo bw’agateganyo ibyavuye mu matora ya Perezida wa Repubulika n’ayabadepite yabaye taliki ya 14,15 na 16 Nyakanga 2024.
Ibyavuye mu matora ya Perezida wa Repubulika agaragazako Paul Kagame ari imbere kurusha abandi aho yatowe n’abaturage 8,822,794 bangana na 99.18%, Habineza Frank atorwa n’abaturage ibihumbi 44,479 bangana na 0.50% naho Philippe Mpayimana atorwa n’abaturage ibihumbi 28,466 bangana na 0.32%
Naho mu matora y’abadepite rusange 53 batorwa mu mitwe ya Politiki n’Umukandida wigenga, nk’uko bikomeza bitangazwa na Komisiyo y’Igihugu y’amatora, ku bwitabire bwa 98.20%, FPR Inkotanyi n’indi mitwe ya Politiki bifatanije ariyo PDC, PPC, PSR, PSP na UDPR batsinze ku majwi 68.83%, PL ikurikiraho n’amajwi 8.66%, PSD n’amajwi 8.62%, DGPR-Green Party igira 4.56%, PDI igira 4.61%, PS Imberakuri igira 4.51% naho Nsengiyumva Janvier wiyamamaje nk’Umukandida wigenga agira 0.21%.
Ku bijyanye n’uko intebe zihabwa imitwe ya politiki, umunyamakuru Oswald Mutuyeyezu aherutse gutangaza ku rubuga rwa X ko ishyaka ryagize ibice byinshi inyuma y’ibizima (integer) ari ryo baheraho baha intebe zasagutse (largest remainder methods)
Intebe zatorewe mu matora rusange yo ku wa mbere ni 53.
Ati “Kugira ngo ubone umubare w’intebe buri mutwe wa politiki watsindiye ufata amajwi yawo ku ijana(%) uwo mutwe wabonye ugakuba na 53.
Hatangajwe kandi amajwi y’abadepite batowe mu byiciro byihariye aribyo; abadepite 23 bagarariye abagore, abadepite 2 bahagarariye urubyiruko ndetse n’umudepite umwe uhagarariye abafite Ubumuga.
Mu cyiciro cy’abagore mu ntara n’Umujyi wa Kigali hatowe abadepite 2 bahagarariye Abagore mu mujyi wa Kigali aribo: Kanyange Phoebe na Gihana Donatha.
Mu ntara y’Amajyaruguru hatorwa abadepite 4 bahagarariye iyo ntara aribo: Uwamurera Olive, Mukarusanga Eliane, Ndangiza Madina na Ndangiza Ingrid Marie Parfaite.
Hatowe kandi abadepite 6 bahagarariye intara y’Amajyepfo aribo: Tuyishime Francine, Uwumuremyi Marie Claire, Uwababyeyi Jeannette, Kayitesi Sarah, Mukabalisa Germaine na Tumukunde Gasatura Hope.
Mu ntara y’Iburasirazuba hatowe Kazarwa Gerturde, Mushimiyimana Lydie, Kanyandekwe Christine, Mukamana Alphonsine, Uwingabe Solange na Mukarugwiza Judith mu gihe mu Ntara y’Iburengerazuba hatowe abadepite 6 aribo Ingabire Aline, Mukandekezi Francoise, Nyirabazayire Angelique, Muzana Alice, Sibobugingo Gloriose na Uwamurera Salama.
Mu cyiciro cy’urubyiruko hatowe Abadepite 2 aribo Umuhoza Gahumba Vanessa watowe ku majwi 73.72% na Icyitegetse Venuste watowe ku mpuzandengo ya 62.35% naho mu bahagarariye abafite ubumuga hatowe Mbabazi Olivia Watowe ku mpuzandengo ya 59.90%.
Bitegenijwe ko kuwa gatandatu taliki ya 27 Nyakanga 2024 aribwo Komisiyo y’Igihugu y’Amatora aribwo izatangaza mu buryo bwa burundu ibyavuye mu matora ya Perezida wa Repubulika n’ay’Abadepite.