Kuva tariki ya 26 Nyakanga 2024, i Paris mu Bufaransa haberaga imikino inyuranye ya Olempike.
Ni imikino yitabiriwe n’abakinnyi 10714 baturutse mu bihugu 206 ndetse n’amakomite olempike yabyo.
Muri iyi mikino, Leta Zunze Ubumwe za Amerika nizo zahize ibindi bihugu kuko ari yo yegukanye imidari myinshi.
Mu mikino myinshi yabaye harimo umupira w’amagaruru mu batarengeje imyaka 23 aho ikipe y’igihugu ya Espanye yatsinze u Bufaransa ku mukino wa nyuma ibitego 5-3 bituma yegukana umudali wa zahabu.
Mu bagore kandi, Leta Zunze ubumwe za Amerika zatsinze Brazil igitego 1-0.
Mu yindi mikino, Basketball mu bagabo, Amerika yatsinze u Bufaransa amanota 98 kuri 87 bituma yegukana umudali wa zahabu.
Mu bagore kandi Amerika yatsinze u Bufaransa amanota 67-66.
Volleyball mu bagabo, u Bufaransa bwatsinze Polonye amaseti 3-0 begukana umudali mu gihe mu bagore u Butaliyani bwatsinze Amerika amaseti 3-0.
Handball mu bagabo, Denmark yatsinze u Budage ibitego 39-26 bituma yegukana umudali wa zahabu, mu gihe mu bagore kandi Norway yatsinze u Bufaransa ibitego 29-21.
Muri rusange Leta Zunze Ubumwe za Amerika zegukanye imidali myishi kuko zegukanye imidali 126 harimo 40 ya zahabu 44 ya silver na 42 ya bronze.